Хрватот Даниел Иванагиќ, управител на консултантското друштво „Интерхолдинг“, по кого беше распишана меѓународна потерница е уапсен на граничен премин при обид за влез во Словенија, каде се наоѓа во екстрадициски притвор.
Телма дознава дека тој бил упасен пред три дена, а од Министерството за правда повеќе детали најавуваат за утре. Иако тој се бараше по меѓународна потерница распишана од судот во Македонија, останува нејасно дали ќе се бара екстрадиција за него, бидејќи тој не е македонски државјанин.
Во отсуство на Иванагиќ, судија на претходна постапка пред три месеци му одреди мерка притвор која требаше да се активира по неговото пронаоѓање.
Иванагиќ и основачот на „Интерхолдинг“, Денис Фудуруќ, по кого сè уште се трага, се осомничени во случајот на поранешниот генерален секретар на Владата, Мухамед Зеќири кој од нив, според македонското Обвинителство за гонење на организиран криминал и корпуција, нарачал изработка на физибилити студија за реструктурирање на „Македонска пошта“.
Зеќири во моментот е во домашен притвор. Според Обвинителството, Зеќири ги исплатил парите, без „Интерхолдинг“ да мине на тендер, нешто што тој го негира.
„Со преземените дејствија, осомничените за правното лице прибавиле значителна противправна имотна корист, а на штета на Буџетот на Република Северна Македонија, во вкупна вредност од 57.932.100,00 милиони денари, износ што бил поголем од 795.000 евра, односно од договорениот износ за вршење на консултантските услуги“, беше наведено во соопштението на Основното јавно Обвинителство за гонење на организиран криминал и корупција.
Мухамед Зеќири останува во притвор, Aпелација ја одби жалбата