Еден од исчезнатите македонски државјани на Халкидики, пронајден е жив и е во релативно добра здравствена состојба, потврдуваат извори од крајбрежната служба на Грција за тамошните медиуми.
Станува збор за 30- годишен државјани на Северна Македонија, кој по над 18 часа од исчезнувањето е пронајден од товарен брод со знаме на Гибралтар којшто пловел во близина во морскиот дел југозападно од Касандра.
Исчезнатиот е најден на околу 14 наутички милји од копното на Халкидики што изнесува околу 20 километри растојание.
Акцијата и потрагата на грчката крајбрежна служба, на грчкиот спасувачки тим и спасувачи волонтери продолжуваат за пронаоѓање на вториот исчезнат.
Потрагата и денеска се води под лоши временски услови со силен ветер од над 40 километри на час, а во акцијата учествуваат бродови на крајбрежната служба, чамци и бродови што се во близина и хеликоптер.
Спасувачката акција започна вчера околу 19 часот по локално време, откако тројцата пријатели, на плажата Мити во Посиди, влегле во морето, но веројатно биле повлечени од струите и брановите, поради лошото време, а еден од нив беше спасен.
Според локалните медиуми, еден од тројцата пријатели имал роденден и дошле на Халкидики за да го прослават, а во некој момент влегле во морето да се капат, без да ги земат предвид силниот ветер и брановите.
Дел од присутните на плажата забележале дека капачите ги снемало и веднаш ја информирале крајбрежната служба, по што започнала и акцијата.
Градоначалничката на Касандра Анастасиа Халкиа за грчките медиуми објаснила конкретната плажа е многу опасна за пливање бидејќи има морски струи и големи бранови.
Солунскиот портал Ворија, утрово објави дека во еден од бродовите со кои се врши потрагата се наоѓаат и таткото и братот на еден од исчезнатите.