Продолжуваат протестите против Француската предлог преговарачка рамка. Повеќе илјади луѓе маршираат низ улиците на Скопје. 5-тиот ден од протестите започна повторно пред владата по што демонстрантите поминаа пред Министерството за надворешни работи и се движат кон Собранието, каде вчера се случи и насилство кога дел од демонстрантите ги нападнаа полицајците кои го обезбедуваа законодавниот дом.
Според информациите на нашиот репортер, Петар Догов, кога поминувале крај Трговскиот центар Мавровка, учесниците на протестот биле гаѓани и со камења и други предмети и провоцирани од некои лица кои не биле дел од протестот.
Се слушнале и истрели во воздух од огнено оружје од вооружен човек, кој веднаш бил приведен од полицијата.
Лидерот на ВМРО-ДПМНЕ, Христијан Мицкоски, на твитер објави дека лицето со пиштол во раката требало да го убие него оваа вечер, барајќи да биде „приведен од Спасовски и МВР“.
Пред почетокот на протестот, Мицкоски даде и изјава за медиумите, во која ги повтори ставовите во однос на предложените документи од ЕУ и апелираше за масовност на протестите, осудувајќи го насилничкото однесување на поеднинци.