Руските сили бомбардирале уметничко училиште во Мариупол во кое се засолнувале 400 лица, обвинија украинските власти. Училиштето е во непосредна близина на театарот, бомбардиран пред 5 денови, и под чии урнатини сѐ уште има заглавено стотици цивили. Спасувачките операции се отежнати поради борбите меѓу двете армии во Мариупол кои веќе неколку денови се водат на улиците на градот, додека времето за цивилите истекува. Украинскиот претседател Володимир Зеленски изјави дека историјата ќе го запамети Мариупол како град каде биле извршени тешки воени злосторства.
Опсадениот Мариупол ќе биде запаметен во историјата на извршени воени злосторства. Да му се направи тоа што окупаторите го направија на тој мирен град е терор кој ќе биде запаметен за навек. И колку повеќе Украинците зборуваат за тоа пред светот, толку повеќе поддршка наоѓаме. Колку повеќе Русија користи терор против Украина, толку потешки ќе бидат последиците, порача Зеленски.
Русија повторно бомбардираше цели во Украина со крстосувачки ракети од бродови во Црното и Каспиското Море, и лансираше суперсонични ракети од воздушниот простор на Крим, соопшти денеска руското Министерство за одбрана. Москва тврди дека во нападите уништен бил „главниот извор на гориво за украинските оклопни возила“ распоредени на југот на земјата, како и фабрика во градот Нижин, која ги поправа украинските оклопни возила оштетени во борбите.
Во Миколаив продолжува потрагата по преживеани војници под урнатините на воената база во градот, која беше бомбардирана во петокот. Според украинските власти најмалку 40 војници загинале во нападот, а тие кои го преживеале сведочат за трауматично искуство.
Продолжуваат да гинат за Украина поради едно глупаво џуџе кое сакаше војна, сакаше врз нас да ги тестира своите нови оружја. Не сакам да зборувам за тоа, не сакам да плачам, но понекогап емоционалниот удар е претежок, изјави украинскиот војник Александар.
Во меѓувреме, турскиот министер за надворешни работи Мевлут Чавушоглу, чија земја изминатите две недели изби како ефикасен посредник во преговорите меѓу Русија и Украина, оцени дека двете земји ги приближуваат позициите околу 4 клучни барања и изрази надеж дека договор ќе биде постигнат. Зборувајќи на ситата тема, и Зеленски оцени дека преговорите се тешки, но и неопходни.
Игор Трајков