„Кочани сака чист воздух, придружи се и ти“, порачаа денеска граѓанските активисти и жителите на Кочани од протестот пред фабричката капија на фабриката за рецикликарање на хартија Пејпер Мил. Побараа фабриката да се врати на метан, а не да користи пелети од сончоглед, државните институции да вршат мерења и во вечерните часови и за време на викендите и конечно да се постави Пречистителната станица за отпадни води.
Поддршка на кочанските еко активисти и граѓани дадоа и еко активистите од Велес, кои цели 15 години ја биеле битката против загадувањето од Тополницата и последиците од неа. Порачаа да бидат истрајни во својата битка.
Од Одборот за здрав живот во Кочани порачаа дека денешниот протест ќе биде само почеток на подолготрајна и поупорна борба против сите загадувачи на животната средина, а проблемите треба да ги решаваат институциите на системот. Во спротивно, помош за добивање на своите права, граѓаните ќе бараат од странски амбасади и институции, но и од Европскиот суд за човекови права во Стразбур, за што почнуваат постапка за собирање потписи.
Викторија Јованова
