Ова се нотите кои Mакедонија и Бугарија ги испратија до Обединетите нации, до кои дојде Телма, а во кои се разјаснува употребата на краткото и долгото име на државата.
Македонската мисија во Обединетите нации, ја достави нотата на 17-ти јануари, еден ден пред посетата на бугарскиот премиер Кирил Петков во Македонија. Во неа пишува дека краткото и долгото име се еднакво валидни и дека никогаш не имплицирале и нема да имплицираат територијални претензии кон било која соседна држава. Се додава и дека и долгото и краткото име ќе бидат во употреба како имиња на суверена држава.
Бугарската нота до Обединетите нации е депонирана на 18-ти јануари, практично истиот ден кога бугарскиот премиер беше во Скопје и во неа се поздравува македонската нота. Бугарија во нотата потврдува дека ја добива вербалната нота и дека со неа ја прифаќаат употребата на долгото и краткото име, Република Северна Македонија и Северна Македонија како еднакви.
Бугарија, претходно ја спореше употребата на краткото име, Северна Македонија, со објаснување дека станува збор за поширок географски регион.