Премиерот Зоран Заев очекува следните денови Министерството за внатрешни работи да го објави извештајот за причините за пожарот во модуларната болница во Тетово за јавноста да биде информирана и за да може како претседател на Владата да донесе одлука за понудените оставки на министерот Филипче и заменик-министерот за здравство Хасани.
– Делот од форензиката и вештачењето што го направи МВР е доставено до Јавното обвинителство и од тој аспект очекувам во следните денови да се објави од страна на Министерството за внатрешни работи, а Јавното обвинителство може да продолжи со истрагата и да утврди други аспекти ако треба, но одговорот на прашањето од што е настанат пожарот и сите детали поврзани со настанувањето на пожарот, очекувам да бидат јавно објавени за да знаат граѓаните, но тоа е и основата за да донесам одлука во врска со понудите оставки на министерот и заменик-министерот за здравство, изјави Заев на денешната прес конференција.
Во досегашната пракса, МВР одбиваше официјално да објави наоди од истрагата и посочуваше дека за истрагите е надлежно јавното обвинителство кое треба да споделува информации.
Премиерот повтори дека германскиот извештај се очекува две недели по нивното заминување од Македонија каде имаа увид во местото на несреќата и во документите.
-Колку што сум информиран од министерот за внатрешни работи по заминувањето на германските експерти начелно за околу две недели се очекува да стигне нивниот извештај, посочи Заев.