Европската унија, плашејќи се од можни политички реакции во земјите членки, повеќе не може да им гарантира членство на шестте балкански земји, на кои претходно им вети мести во клубот, пишува Ројтерс пренесувајќи ги ставовите на четири дипломати и содржината на еден неофицијален документ во кој новинската агенција имала увид.
Документот се однесува на заедничката декларација за сѐ уште неодржаниот самит ЕУ-Балкан, закажан за 6 октомври, на кој Брисел планираше да ја потврди својата недвосмислена подршка за европската иднина на регионот. Според дипломатите, дури и по две рунди разговори, земјите членки сѐ уште немаат постигнато согласност за декларацијата.
Европските земји не ги откриваат своите позиции по ова прашање, но според диломатите, богатите северни земји, како Данска, Франција и Холандија, стравуваат од повторување на избрзаната интеграција на Бугарија и Романија во ЕУ во 2007-та година, и лошото менаџирање на миграцијата на работната сила од Источна кон Централна Европа и Британија, пишува Ројтерс.
Од друга страна, членките кои се пропоненти на проширувањето, како Австрија, Италија, Хрватска, Словенија и Балтичките земји, ги критикуваат Франција и Германија дека не извршиле доволно притисок врз Бугарија да го повлече ветото за Македонија, и да се одблокира процесот на проширувањето.
Фон дер Лајен: Разговараме и со Бугарија за надминување на последната пречка