Културно-уметничка програма за различни вкусови има, но обединување нема! Првите луѓе на политичките структури и овој Илинден го поминаа на различни локации и со засебни видувања за начинот на кој треба да се прославува.
Иако опозицијата не ја прифати идејата на претседателот Пендаровски за централна прослава во Крушево без говори и без политички пораки за да се избегне вообичаено напнатата атмосфера, тој повторно повика на обединување. Во видео порака, ја посочи „слободата како највисок идеал за еден народ“ и Илинденските и Асномските победи како остварување на тој сон.
Пендаровски претпладнето остана верен на традицијата: положи цвеќе на гробот на претседателот на крушевската република Никола Карев во споменикот Македониум на Грумење и присуствуваше на панихидата за загинатите илинденци. Присуствуваа и бројни делегации, а вечерва му се придружуваат лидери, меѓу кои и Али Ахмети.
„Ќе го разочарав народот ако отидев со нив“, одговори опозицискиот лидер Христијан Мицкоски од Струшко Ташмаруништа. Го обвини Пендаровски дека не може да биде фактор на обединување бидејќи не му се спротивставил на Заев.
Мицкоски повика на обединување против власта. Тие што нема да се обединат ќе ги смета за „Заева испостава“.
Мицкоски најави дека и в година за Илинден ќе дојде во Ташмаруништа. Тоа би било петти пат по ред. Државната прослава на националниот празник е на три локации: Крушево, Пелинце и Скопје, со ротација на претседателите на Републиката, Собранието и на Владата.
Соња Николовска