ВМРО ДПМНЕ и СДСМ се сложија околу потребата и содржината на Резолуцијата за црвените линии во односите со Бугарија, но се разидоа околу името на државата во документот.
Извршниот комитет на ВМРО ДПМНЕ уште еднаш потенцира дека нема да го смени ставот и дека останува на концептот за кој, за прв пат, партиите можат да најдат минимум простор за заеднички позиции.
Усвојувањето ваква резолуција би било важно за забрзување на европската перспектива и алатка за македонската дипломатија.
Велат дека додека ВМРО ДПМНЕ нуди единство, СДСМ бара причина за разединување.
СДСМ одговори со прашање: Дали ВМРО ДПМНЕ предлага Резолуција за да се усвои или за да заглави во формални процедури заради нивниот лажен патриотизам.
“Одредбите на македонскиот Устав не може да се почитуваат селективно. Македонските државни позиции се силни и јасни, но ќе бидат уште посилни ако ВМРО ДПМНЕ го прифати Договорот од Преспа како реалност која овозможи Северна Македонија да стане полноправна членка на НАТО со меѓународно потврдени македонски јазик и македонски идентитет” – велат од СДСМ.
Резолуцијата се уште не е ставена на дневен ред, а не им е ни вратена на предлагачите.
За разлика од неа, интерпелацијата за Талат Џафери, која беше поднесена во исто време, во почетокот на месецот, е вратена на предлагачите, кои не го користеле уставното име на државата.
Ја поднесоа ВМРО ДПМНЕ и Левица поради говорот на Џафери на албански јазик во Европскиот парламент.
Соња Николовска