За децата во Грција, родени до 31 декември 2005 година в четврток се отвора платформата за закажување термин за вакцинација, а потребна е согласност од родител или старател, соопшти попладнево генералниот секретар во Министерството за здравство на Грција Мариос Темистоклеус на денешната редовна прес конференција.
Имунизацијата на тинејџерите е по зеленото светло од Комисијата за вакцинација, од минатата седмица.
За процесот на имунизација во Грција, Темистоклеус соопшти дека со една доза е вакцинирано 50 отсто од населението, односно 59 проценти од полнолетното население, а целосно вакцинирани се 41 отсто од граѓаните, односно 48 проценти од полнолетното население.
Во однос на новите случаи на Ковид-19 во Грција, повторно се регистрирани над 2.000 новозаразени, иако е значително намален бројот на тестови, односно регистрирани се 2.065 случаи од 36.790 тестови, од кои само 6.008 се ПЦР, а останатите се брзи тестови.
Според официјалните податоци од Националната организација за јавно здравје, во изминатите 24 часа починаа десет лица, а 139 се приклучени на апарати на Одделите за интензивна нега.
Грчкиот премиер Кирјакос Мицотакис, вечерва ќе ги соопшти владините одлуки поврзани со пандемијата и процесот на вакцинација.