Доцнат платите од ноемри наваму на ангажирани со договор на определно време во повеќе музејски установи, реагира Синдикатот за култура. Од таму велат дека се работи за особено ранлива категорија граѓани за кои вработувањето е неизвесно, немаат здравствено и пензиско осигурување , а за работата земаат двојно помала нето плата од вработените во редовен работен однос.
Трагедија . Лица кои што се времено ангажирани да извршуваат некаква работа во институциите, ангажирани да пополнат работни места, извршители се на работни задачи кои му требаат на музејот, да не земаат плата 3 или 4 месеци. Сепак , станува збор за луѓе кои што најверојатно долго време се невработени и пробуваат да најдат некаква егзистенција, изјави Гоце Павловски од Синдикатот за култура.
Иако формално не се членови на СК, оштетените ја контактирале синдикалната организација и го изразиле разочарувањето од ситуацијата, дополнува Павловски.
Како што дознава Телма, се работи за лица ангажирани во Музејот на Македонија, Музејот на современа уметност и во Археолошкиот музеј. Потврда добивме од директорката на Археолошки , Славица Бабамова која во телефонскиот разговор ни рече дека проблемот не е до нив и дека чекаат на потребните сретства од Министерството за култура. Од МСУ ни одговорија дека кај нив проблемот се провлекува од декември наваму, а од Музејот на Македонија велат дека ова не е прв пат со месеци да доцнат платите и на договорците и на вработените на неопределено.
Од Министерството за култура без одговор зошто доцнат платите. Но, велат дека во пропишаниот рок испратиле барање до Министерството за финансии и дека на 27 јануари добиле назад одобрување на нивното барање. Сега тече постапката на процесуирање на исплатата на платите во институциите, дополуваат од ресорот Култура.
Сотир Трајков