Доктор Светлана Смугреска, педијатар од Драчево, во вечерашната Топ Тема изјави дека процесот на тестирање на случаите сомнителни на Ковид -19 е исклучително тежок, бидејќи голем дел од граѓаните едноставно немаат средства за да се тестираат во приватните лаборатории, каде тестовите се прилично скапи. Тие луѓе чекаат слободен термин во јавното здравство, вели Смугреска.
Таа оцени и дека во грижата за пациентите сомнителни за Ковид-19, потребни се тријажни центри , каде би можеле да се прават рентгенолошки испитувања, лабораторија, биохемиски испитувања а за жал кај нас тоа не постои.
Доктор Смугреска го потенцираше и фактот дека голем дел од матичните лекари се изложени на голема опасност од зараза со корона вирус. Иако засега нема проценка колку од матичните лекари се позитивни на Ковид, таа пренесе дека во нејзината амбуланта повеќе од половината од лекарите биле или се заразени со корона вирусот. Во тој контекст, матичните лекари се претежно оставени сами на себе, за набавување на заштитната опрема, чии цени исто така се зголемени во услови на пандемија.
Во однос на грижата за лицата позитивни на Ковид-19, Смугреска оцени дека грижата за возрасните заразени лица е исклучително тешка, бидејќи еден доктор да се јави на 60 луѓе за да се информира како се чувствуваат тие и какви симптоми имаат е премногу тешко и губење на време и енергија.
Истовремено и грижата и терапијата која се припишува на пациентите понекогаш оди по автоматизам и знае да има контра-ефект , бидејќи на пример премногу едноставно се припишуваат големи дози Витамин Д , што од друга страна може да направи други проблеми, како проблеми со бубрезите.