Една недела пред истекот на крајниот рок, мандатарот Зоран Заев достави до Собранието предлог-програма и состав на новата Влада. Неговиот кабинет треба да има 19 министри – 7 помалку од претходната Влада. Најавува дека ќе се концентрира на домашните прашања поврзани со економијата, судството, здравството, образованието, екологијата и стандардот. Се очекува Владата, зад која стојат 62-ца пратеници, да почне со работа наредната недела, доколку во деновите од викендот заврши собраниската процедура со гласање на мнозинството.
Борба за секое работно место и за секој правен субјект, прочистување на судството, проверка на потеклото на парите и имотот на функционерите, подинамичен економски раст, справување со светската пандемија, добри меѓусоседски и меѓуетнички односи, внатрешна кохезија…Ова се дел од ветувањата на мандатарот Зоран Заев, дадени при поднесувањето на програмата и составот на Владиниот кабинет составен од 19 министри.
Заев верува дека минималната поддршка од 62-ца пратеници е доволна за стабилна Влада.
Мандатарот предлага 11 министри од СДСМ, 6 од ДУИ и по еден од ЛДП и од БЕСА. Ќе има четири вицепремиери: Артан Груби кој ќе го води и Министерството за политички систем, Љупчо Николовски – за борба против корупција, Фатмир Бетиќи – за економија и Никола Димитров – за европски прашања. Оливер Спасовски се враќа во внатрешни работи, Радмила Шеќеринска останува во одбрана, Крешник Бектеши во економија, Насер Нуредини во животна средина, Венко Филипче во здравство а Горан Милевски во локална самоуправа. Бојан Маричиќ треба да биде министер за правда, Благој Бочварски за транспорт и врски, Мила Царовска за образование, Јагода Шахпаска за труд, Ирена Стефоска за култура, Бујар Османи за надворешни работи, Фатмир Бесими за финансии, Јетон Шаќири за администрација и Аријанит Хоџа за земјоделство.
Се очекува изборот на Владата да заврши овој викенд. Веднаш потоа, Заев најави дека ќе го предложи и составот на замениците министри, кој е 90 одсто договорен и ќе ја отсликува етничката и политичка разноликост во земјата.
Соња Николовска