153 нови пациенти со потврден Ковид-19 регистрираа епидемиолозите од вчера до денес. Починаа шестмина. Ова се најновите информации во редовниот дневен извештај на здравствените власти кои информираа дека во последното деноноќие се направени вкупно 1279 тестови.
Најмногу од регистрираните се во Скопје, 66. Во Тетово повторно е регистрирана висока бројка од 20 нови случаи. Двоцифрен број дијагностицирани пациенти се потврдени уште и во Куманово и Штип со по 13 и Ресен со 12 случаи.
Министерот за здравство Филипче вели дека иако бројот на новопотврдени случаи и понатаму е висок – ситуацијата е под контрола. Има помал број на приеми во болниците, а тоа е еден од најважните фактори за Комисијата за заразни болести кога одлучуваат за мерките.
Од починатите 6 лица, двајца се од Штип. Останатите се од Скопје, Тетово, Охрид и Ресен.
Во извештајот на Институтот за јавно здравје добра вест се 75 оздравени. Најмногу во главниот град, 47. Во Штип има 13 оздравени, а по неколку пациенти со два негативни теста има од други десетина градови во последното деноноќие.
Петар Догов