Македонската репрезентација ја забележа втората победа на Светското младинско првенство што се одржува во Скопје. По триумфот на Узбекистан со 39:30 нашата селекција на едно коло пред крајот обезбеди пласман во следната фаза од Мундијалот.
Избраничките на селекторот Љубомир Савевски лошо го отворија мечот. Очајната игра во одбраната и слабата реализација во нападот придонесоа репрезентацијата на Узбекистан да поведе со 8:2, а предноста ја одржуваа се до 29-тата минута кога со погодокот на Марија Јанкуловска стигнавме до првото водство од 19:18, а на одмор заминавме со предност од 20:19.
Во продолжението од натпреварот нашата селекција играше далеку подобро. Со серија од 5:1 поведовме со 25:20 и како одминуваше времето предноста ја зголемувавме и во еден момент стигнавме до двоцифрено водство за на крајот да забележиме победа од 39:30.
Најефикасна во македонската репрезентација беше Бојана Коцева со девет гола и таа беше клучниот играч за пресвртот и кршењето на отпорот на противникот.
Емилијана Ризоска постигна осум, а Марија Јанкуловска шест погодоци.
Поради лошата игра во дефанзивата нашите голманки Матеа Чурлиновска и Марија Јовановска комбинирано забележаа само девет интервенции.
Во последното коло во вторник во директен дуел за првото место во групата ќе се соочиме со Иран, а мечот што ќе се одигра во А1 арената Борис Трајковски почнува во 20 часот и 30 минути, а влезот за сите заинтересирани е слободен.
ФОТО: Игор Паневски