Синот на поранешниот филипински диктатор Фердинанд Маркос денеска положи заклетва како претседател како резултат на децениските напори на неговото семејство повторно да ја води земјата откако беше соборен од народното востание во 1986 година, пренесе АФП.
Шеесет и четиригодишниот Фердинанд Маркос Јуниор, познат и како Бонгбонг, кој извојува убедлива победа на изборите минатиот месец, ја презема функцијата од Родриго Дутерте, меѓународно најпознат по неговата смртоносна војна против дрогата.
Тој положи заклетва на јавна церемонија во Националниот музеј во Манила, на која присуствуваа стотици локални и странски претставници, меѓу кои и кинескиот потпретседател Ванг Кишан.
Во присуство на неговата 92-годишна мајка Имелда, која седеше неколку метри од него, го пофали владеењето на својот татко, диктаторот кој владееше со архипелагот речиси три децении. Маркос Јуниор рече дека неговиот татко изградил повеќе патишта и одгледувал повеќе ориз од сите негови претходници заедно.
„Така и неговиот син. Нема да барам изговори“, увери тој.
Растот на цените во земјата ја погодува нејзината економија, која веќе е уништена од КОВИД-19 – Маркос Јуниор како свои приоритети ја најави борбата против инфлацијата, враќањето на економското закрепнување и зголеменото производство на храна.
Повеќе од 15.000 полицајци, војници и крајбрежна стража беа стационирани во главниот град во врска со церемонијата.