Лидерите на трите најголеми европски земји, Германија, Франција и Италија, се очекува денеска да пристигнат во Киев за да ја покажат својата поддршка за Украина, која се бори со тековната руска инвазија. Посетата на германскиот канцелар Олаф Шолц, францускиот претседател Емануел Макрон и италијанскиот премиер Марио Драги се подготвува со недели. Тројцата сакаат да ги отфрлат критиките во самата Украина за начинот на кој реагираат на војната, јави ДПА.
Нивната очекувана посета, која не е најавена од безбедносни причини, ќе се случи еден ден пред Европската комисија да го усвои мислењето дека Украина ќе добие статус на кандидат за ЕУ, нешто што најголемите земји не сакаа да го сторат, наведува агенцијата.
Францускиот претседател вчера во Романија изјави дека е време Европа да ја увери Украина во нејзината европска перспектива. „Дојдовме до точка кога ние како Европејци мора да испратиме јасен политички сигнал до Украина и нејзиниот народ, кој херојски пружа отпор“, рече тој, но не наведе детали.
Киев ги критикуваше Франција и Германија, а во помала мера Италија, за одложување и неуспехот да ја обезбеди бараната помош, испраќајќи им оружје и ставајќи го својот просперитет на прво место, наместо слободата и безбедноста на Украина. Оваа недела, Олексиј Арестович, советник на украинскиот претседател Володимир Зеленски, изјави за Билд дека се плаши дека тројцата лидери ќе сакаат да извршат притисок врз Киев да го убедат да прифати мировен договор поволен за рускиот претседател Владимир Путин. Како одговор, Драги рече дека е важно да се започнат мировните преговори што е можно поскоро, но додаде дека тие треба да се водат под услови кои Украина ги смета за прифатливи. Се очекува Зеленски да ги повика тројцата лидери да испратат повеќе оружје за да и помогнат на украинската армија да се спротивстави на руските напаѓачи. Киев е особено критичен кон Берлин, од кој го очекува долго ветуваното, но сè уште не испорачано тешко оружје.
