49 милиони французи со право на глас денеска одлучуваат за тоа кој ќе влезе во Eлисејската палата и ќе ги води во наредните пет години. Избираат меѓу актуелниот претседател и лидер на Република во движење Емануел Макрон и кандидатката на десницата Марин Ле Пен.
Ова е трет обид на Ле Пен за влез во Елисејската палата, а нејзин пораз ќе значи и смена на раководството на нејзината партија Национален собир. Макрон оцени дека изборите претставуваат референдум за Европа, имајќи предвид дека двајцата кандидати предлагаат две многу различни иднини за земјата. Првите проекции се очекуваат околу 20 часот, но ако има тесна трка ќе се чека конечниот резултат.
До пладне излезноста е 27 отсто, што е за два поени помалку во однос на претходните избори во вториот круг во 2017-та.
Според последните одбјавени анкети, се очекува макрон да победи со 57 отсто гласови во однос на Ле Пен, која би можела да добие околу десетина процентни поени помалку. Сепак, можно е разликата да биде и потесна, со оглед на тоа што ќе одлучуваат гласачите кои во првиот круг гласаа за левицата, а овојпат не сакаат да гласаат ниту за Макрон, ниту за Ле Пен.
