Шеесет и петгодишен маж од Скопје е осомничен за убиство на матичниот доктор Ацо Трповски од Поликлиниката „Железара“, а неговата шест години помлада сопруга за помагање во извршување на кривичното дело, соопшти Јавното обвинителство. Убиството се случи во март во 2024 година на паркинг во населбата Автокоманда по што двајцата осомничени го одвезле телото на убиениот во дворот на Поликлиниката во неговото возило.
„Осомничената се договорила со жртвата да се најдат на наведеното место. Кратко време откако влегла во неговиот автомобил, пристигнал осомничениот. Тој ја отворил вратата од возилото и го извлекол оштетениот, со кого започнале вербално да се расправаат. Во еден момент, осомничениот извадил нож и му нанел девет убодни рани во градите и телото од кои оштетениот починат. Сопружниците заедно го ставиле телото на предното седиште од автомобилот. Осомничениот го одвезол до паркингот на Поликлиниката Железара, каде го префрлил починатиот на возачкото седиште. Осомничената со средство ги избришала трагите од автомобилот, по што двајцата заминале“, се наведува во соопштението на Обвинителството.
Обвинителството не открива детали за мотивите на убиството, ниту за истрагата која ги одвела до осомничените сопружници за кои е побарана мерка притвор.
Свежи траги од крв, но и многу прашања без одговори – кој и зошто го уби матичниот лекар од Скопје