Франција денеска за првпат го активира планот за вонредни ситуации како одговор за екстремните температури. Механизмот ќе се применува во сите департмани во кои на сила е црвен аларм поради топлотниот удар, најави портпаролката на француската влада, Мод Брењо.
„Ќе отвориме разладни центри за да ги згрижиме најранливите категории“, изјави Брењо.
Планот е претставен на 2 јули и предвидува мобилизација на дополнителни ресурси за време на исклучително високи температури, а вклучува и мерки за пронаоѓање и помош на лица кои живеат сами или се изолирани.
Според најновиот извештај на метеоролошката служба Метео Франс, во девет департмани во западниот дел на земјата од денеска ќе бидат под црвен аларм на предупредување. Портокалов аларм е на сила во 72 департмани.
Долготрајните високи температури придонесоа и за избивање на шумски пожари. Само во првата недела на јули изгореа над 9.000 хектари на земјиште, што е речиси три пати повеќе од истиот период лани.