Претседателот на УЕФА, Александар Чеферин, денеска престојува во официјална посета на Македонија, на покана на првиот човек на Фудбалска федерација на Македонија, Масар Омерагиќ. Во рамки на посетата, Чеферин оствари средби со државниот врв, вклучително и со премиерот Христијан Мицкоски и министерот за спорт Борко Ристовски.
Омерагиќ истакна дека поддршката од УЕФА претставува значаен поттик за реформските процеси во македонскиот фудбал, нагласувајќи дека соработката со европската куќа на фудбалот е клучна за развојот, особено во инфраструктурата, младинските категории и организациските промени.
„Александар Чеферин со знаење, храброст и одлучност го води европскиот фудбал низ големи предизвици и уверен сум дека и понатаму ќе придонесува за негов развој“, изјави Омерагиќ.
Од ФФМ оценуваат дека ваквите средби се потврда за добрите односи и зголемената доверба кон македонскиот фудбал, кој во наредниот период може да очекува дополнителна поддршка преку конкретни проекти и програми.
Во делегацијата на УЕФА, покрај Чеферин, се и Зоран Лаковиќ, директор за национални асоцијации, како и Денис Бастари, раководител за развој на национални асоцијации.