Државната изборна комисија (ДИК) почна со дистрибуција на 4.613.438 гласачки ливчиња за локалните избори кои ќе се одржат в недела на 19 октомври, а најдолгото ливче е половина метар.
„Согласно законските рокови, денеска од печатницата „Киро Дандаро“ во Битола, ДИК врши дистрибуција и примопредавање на целокупниот доверлив изборен материјал до сите 80 Општински изборни комисии (ОИК) и комисијата на Град Скопје. Доверливиот изборен материјал се состои во сите испечатени изводи на избирачките списоци, испечатеани изводи на оригиналните обрасци записници за секое избирачко место и секоја ОИК, како и сите гласачки ливчиња. Седумнасет тимови на ДИК во текот на денов заедно со обезбедување на МВР ја вршат дистрибуцијата на материјалот. Испечатени се вкупно 4.613.438 гласачки ливчиња за цела држава, а тоа се ливчињата за градоначалници, советници, како и за гласачките ливчиња за Град Скопје, посебно за градоначалници и посебно за Совет на Град Скопје“, посочи претседателот на ДИК; Борис Кондарко.
Битолската печатница изработи 254.262 испечатени страници на избирачките списоци и посебните изводи на избирачките списоци, потоа 8.692 обрасци оригинални записници како доверлив иборен материјал за утврдување на изборните резултати и 8.330 примероци на Брајово писмо.
„Во единствениот избирачки список се запишани 1.832.415 избирачи. Во земјава има 3.480 избирачки места, но в недела ќе бидат отворени 3.474 избирачки места, бидејќи во шест избирачки места нема население“, нагласи Кондарко.
Најдолгото ливче е половина метар, информира Вангел Талевски, генерален директор на АД печатница „Киро Дандаро“-Битола.
„Доверливиот материјал го испечативме во рекордно време, два дена пред зададениот рок. Искуството од минатото нѝ овозможи овој предизвик успешно да го реализираме. Оваа година листите беа прилично долги, но материјалите ги подготвивме соодветно на барањата на ДИК и се заврши добро. Гласачките ливчиња се со двојна видлива и невидлива заштита и подготвени за успешни избори. Најдолгото ливче е 500 милиметри“, потврди Талевски.