Претседателката на Европската комисија (ЕК), Урсула фон дер Лајен застана во одбрана на трговскиот договор што го постигна со САД, нарекувајќи го „најдоброто што можевме да добиеме“ и додаде оти не треба да се потценува, со оглед на претходните закани за царини од 30 отсто.
„Договорот гарантира безбедност во неизвесни времиња и носи стабилност и предвидливост“, порача Фон дер Лајен пред напуштање на Шкотска.
Основната царина од 15 отсто за увоз во САД од Европската Унија ќе се применува на голем дел од производите, вклучително автомобили, полупроводници и фармацевтски производи, рече Фон дер Лајен. Договорена е нулта царинска стапка за одредени стратешки производи, вклучително авиони и делови, одредени хемикалии и некои генерички лекови. Таа додаде дека не е договорена царинска стапка за вино и за жестоки пијалоци.
Европската Унија (ЕУ) се обврза дека ќе купи и американски течен гас и нуклерано гориво во вредност од 750 милијарди долари во наредните три години. Европската комисија предложи постепено укинување на увозот на руски гас до 1 јануари во 2028 година.
