Собранието ќе добие безбедносна зона од 1,5 хектар, со воздушна граница од 100 метри во вис и забрана за протести- ќе предизвика и финансиски трошоци за откуп на земјиштето планирано за приватен паркинг

Координаторите на сите пратенички групи се потпишаа на заеднички предлог закон за прогласување на Просторот околу Собранието на Република Северна Македонија за безбедносна зона. Пред координаторите, прв како предлагач е потпишан собранискиот претседател Африм Гаши. Законот ќе оди во скратена постапка и нема да биде бесплатен за граѓаните бидејќи се планирани засега непознати финансиски импликации за откуп на земјиште.

Собранието ќе треба да го откупи и плацот за планираната катна гаража во паркот до Собранието. Таа парцела сега е во сопственост на приватна фирма. Просторот беше расчистуван минатото лето, но изградбата не почна, а неколку преостанати дрвја беа исечени. Катната гаража е наведена како дополнителна причина за носење на законот.

Во предлог законот е предвидено дека безбедносната зона ќе има површина од 1,55 хектари а ќе се простира и во височина од 100 метри над површината на плацот. Во предлог законот е наведено и што е забрането.

Во безбедносната зона се забрануваат:

1. градежни активности;
2. поставување на линиска и инсталациона инфраструктура;
3. одржување на јавни собири, протести или манифестации;
4. летање со дронови и други типови на беспилотни воздушни летала во воздушниот простор над Собранието и безбедносната зона и
5. вршење на други работи со кои се нарушува или оневозможува нормалното функционирање на Собранието и објектите што се наоѓаат во непосредна близина на Собранието, а се до границите на безбедносната зона.

Со предлог законот се забрануваат измени на ДУП и урбанистички планови за просторот на безбедносната зона на Парламентот, а сите досегашни одобренија за градба престануваат да важат.

-Со оглед дека се работи за уредување на законска материја преку која ќе се овозможи сигурност на надворешниот и внатрешниот простор и луѓето кои доаѓаат во собраниската зграда, а со тоа ќе се елиминира секаков можен ризик заради непречено функционирање и работење на Собранието и овозможување на слободен пристап на пратениците, надворешните лица кои учествуваат во работата на Собранието (преставници на Владата и на органите на државната управа и на други органи) и на вработените во Службата на Собранието, се предлага земјиштето околу Собранието да се прогласи за безбедносна зона, по примерот на голем број држави, стои во образложението за законот.

Миомир Серафиновиќ

Универзитетски професор со втор министерски обид и поранешен новинар и маркетинг агент- Собранието ги објави биографиите на предлозите за нов министер и заменик министер