Само во јануари оваа година јајцата за јадење во САД поскапеле за 15,3%. За една година, растот на цената на јајца во Америка бил повеќе од половина односно годишната инфлација изнесува неверојатни 53%.
На интернет пребарувачот на големиот трговски центар Walmart, најевтина понуда за јајца е за пакување од 60 парчиња од класата А односно најмалите јајца во малопродажба. Кутија со, по нашки кажано, две табли чини 39,38 долари односно околу 2 300 денари. Или едно јајце е околу 38 денари. Тоа е речиси 4 пати поскапо од цената на јајцата со големина L во Македонија.
Цените на јајцата допрва се очекува да скокаат во САД. Причината е ликвидација на огромни јата на кокошки и други птици-несилки поради долгата и голема епидемија на птичји грип. Последниве две години поради болеста се уништени околу 110 милиони кокошки.
Огромниот пазар има побарувачка, а единствениот извезувач на јајца во САД е Турција која планира да го зголеми за 6 пати извозот. И во Америка, во 2025-та да извезе околу 420 милиони јајца (во 2024-та се извезени 71 милион турски јајца). Годишната побарувачка на американскиот пазар е околу 7,5 милијарди јајца.
Особено интересни се написите за проблемот во која американските медиуми наведуваат дека решението е во јајца од Турција односно Turkey по што следува заграда и обајснување дека станува збор за држава, а не за мисирки, бидејќи и државата и птицата се пишуваат исто ама значат различно. Американците и натаму го користат Turkey за државата од Босфорот иако официјална Анкара издаде препорака за да нема забуни и шеги, за име на државата да се користи топонимот Туркије.
Едно од решенијата е вакцинација на птиците за да се спречи ширењето на болеста, но тогаш може да се предизвика друг проблем- неможност за лоцирање на жариштата и намален интерес за купување на месо од живина произведено во САД кои се најголеми светски извозници на тој прехранбен производ.
Бидејќи епидемијата на птичјиот грип се уште не е завршена, а обновата на фармите со птици носилки ќе трае неколку години, цената дополнително ќе расте. Прогнозите се дека оваа година ќе има поскапување од дополнителни 20%. Или за порција од две јајца на око ќе треба да се платат наместо 76, 90 денари. Односно еден и пол долар.