(ФОТО Илустрација) Жител на велешко е обвинет за предизвикување општа опасност со намерно подметнување на пожар, соопшти денеска обвинителството. Станува збор за 25-годишен жител на Горно Оризаи кој е уапсен пред три дена.
-Обвинетиот 25-годишник, на 21 јули, на дива депонија во селото, со умисла предизвикал пожар, палејќи стари седишта од автомобил. Бидејќи местото било обраснато со сува трева, а на депонијата имало и бали суво сено и други предмети, огнот брзо се проширил. Со тоа обвинетиот предизвикал значителна опасност по животот и телото на луѓето и по имотот во околните села, велат од обвинителството.
Уапсениот за кого е баран и притвор ќе се гони за кривично дело по член 288 став 1 од Кривичниот законик. „Опасноста да биде предизвикана штета од големи размери со ваквите дејствија на обвинетиот е особено изразена со оглед на алармантната состојба со пожарите во околината на Велес и на територијата на целата држава“, соопшти обвинителството.
За делото, за кое се гони приведениот, предвидена е казна од 6 месеци до 5 години затвор.
