Прекршочни пријави за градоначалниците на Чаир и на Тетово и за нивните општини како правни субјекти, е епилогот од петочниот скандал, кога не беше почитуван протоколот и беа игнорирани државните симболи при посетата на косовскиот премиер, Албин Курти.
Денеска биле повикани во полициски станици каде што биле информирани за казните.
Полицијата уште трага по лицето кое го вееше знамето на „Голема Албанија„, но најавуваат дека, кога ќе биде пронајден, против него ќе биде поднесена кривична пријава.
Градоначалниците одбиваат да преземат одговорност и излегоа со обвинувања.
Тетовскиот градоначалник, пак, на Фејсбук напиша дека комунизмот не е мртов.
Алтернатива, пак, обвинија дека ова е стамен и тенденциозен чин, нарачан од страна на српскиот претседател, Александар Вучиќ. Курти вчера се огради од случувањата, велејќи дека Македонија ја смета за сојузник, а средбите во Чаир и Тетово не биле насочени кон никого.
И претседателката на Косово, Вјоса Османи, се обиде да го ублажи скандалот, велејќи дека, посетата на Курти на Македонија била погрешно разбрана, додавајќи дека истакнувањето на знамето на „Голема Албанија“ во Тетово не било организирано, туку граѓани го донеле самоиницијативно, пренесува приштинска „Коха“.
Далиборка Демјанска Цветанова