Бугарскиот став останува непроменет. Македонија треба што поскоро да го започне и заврши преговарачкиот процес и да стане полноправна членка на Европската Унија (ЕУ), како резултат на сопствениот придонес и со исполнување на критериумите за членство, а не врз основа на политичка одлука, смета претседателот на бугарското Собрание, Росен Жељазков. Тој во интервју за БГНЕС нагласува дека за Бугарија е важен условот „поставен од Европската комисија“ за уставни измени.
„Тоа не е наше билатерално прашање. Тоа е услов кој е поставен и евидентиран во условите за почеток на преговорите и го следи Европската комисија“, вели изјави Жељазков.
„Сметаме дека ќе ги исполнат условите за членство и не треба да губат време, бидејќи најлошо е да се губи време кое ќе се претвори во скептицизам. На Македонците им требаат брзи одлучни акти и решителни одлуки, без да ја бараат причината надвор. Многу е важно причините, намерите и успесите да бидат нивни“, додаде Жељазков.
Според претседателот на бугарското Собрание, условите кои ги постави Европската Комисија за нив се важни, бидејќи се поврзани со правата на Бугарите во Македонија.
