Хрватска продолжува да се бори со жестоките поплави. Врвот на обилните дождови се очекува денеска, по најавата за пристигнување на голем воден бран од Словенија.
Откако за само 24 часа наврнаа 250 литри на метар квадратен, водостојот на реката Зрмања во Обровац достигна историски 302 сантиметри, што е дури 39 сантиметри над највисокиот водостој на Зрмања измерен во тој град. Тешка е ситуацијата и во Грачац. Вчера најкритично беше во Хрватска Костајница каде беше прогласена вонредна состојба, а реката Уна расте од час во час.
Борбата со поплавите се води и во Карловачкиот регион. Според проценките, максималните водостои на реката Купа во Карловац се очекуваат во текот на вечерта, а утринава беа измерени 826 сантиметри, што е 4 сантиметри под прагот за прогласување вонредна состојба. Реката Корана веќе се излеа од коритото.
Хрватскиот министер за внатрешни работи при посетата на Обровац рече дека климатските промени веќе се чувствуваат во земјата, која се соочува со поплави невообичаени за овој период од годината.