Меѓусоседска расправија во смрт однесе двајца жители на Демир Капија, едниот на возраст од 72 години, а вториот на 34 години. Обвинителство потврди дека станува збор за убиство и самоубиство, но обдукцијата треба да покаже кој прв го повлекол орозот на огненото оружје, а потоа и сам си пресудил. Градоначалникот на Општина Демир Капија, Лазар Петров за Телма вели дека жителите на градот, но и јавноста од Тиквешијата се потресени од овој настан.
Од Министерството за внатрешни работи (МВР) информираа дека двајцата соседи се пронајдени рано утринава во нивните домови.
„Денеска, во 06:50 часот, во Полициската канцеларија Демир Капија било пријавено дека во нивните домови со прострелни рани биле пронајдени Б.М. (34) и М.К. (72), двајцата од Демир Капија. Смрт кај двајцата констатирал лекар од Итна медицинска помош, а во координација со јавен обвинител на местото се врши увид“, се вели во соопштението од МВР.
Според податоците од МВР, повозрасниот и претходно го пријавувал својот помлад сосед за тропање од горе. Последното пријавување е на 19 јануари оваа година. Подолг временски период имале нарушени меѓусоседски односи, но немале ниту контакт, ниту некои инциденти. Досега немало тепачки меѓу нив.
Викторија Јованова