Тројца македонски државјани се лишени од слобода, бидејќи во 2014 година се приклучиле во вооружени формации на Исламска држава на територијата на Сирија и активно учествувале во воените дејствија како борци, информира Министерството за внатрешни работи (МВР). Акцијата е спроведена во координација меѓу Бирото за јавна безбедност – Оддел за сузбивање на организиран и сериозен криминал – Сектор за борба против тероризам, насилен екстремизам и радикализам со Агенцијата за национална безбедност и Франција која постапи по меѓународна потерница што ја издаде Македонија.
„Лицата О.С (28), Р.С. (33) и М.Г. (26), во изминатиот период, беа предмет на интерес на безбедносните служби и во меѓународна соработка на МВР и АНБ со други партнерски безбедносни служби, активностите резултираа со истовремена синхронизирана полициска акција спроведена на територија на Република Северна Македонија и Франција, при што се лишени од слобода две лица во нашата држава и едно лице во Франција, а сите се државјани на Република Северна Македонија“, соопшти МВР.
Од таму додаваат дека, постапувајќи по Наредби за претреси во дом и други простории од Судија за претходна постапка, денеска, во утринските часови, беа извршени претреси на две локации во Скопје кај О.С. и Р.С.
„Пронајдени се и одземени огнено оружје, муниција, мобилни телефони и други електронски уреди кои можат да содржат дополнителни докази за извршеното кривично дело“, информираат од МВР.
Согласно обезбедените докази, Секторот за борба против тероризам, насилен екстремизам и радикализам до Основно јавно обвинителство за гонење на организиран криминал и корупција денеска поднесе кривична пријава против наведените лица за сторено кривично дело „служба во непријателска војска“ предвидено во член 322 од Кривичен законик.