Јавното обвинителство одреди притвор за двајцата криумчари од Скопје кои вчера кај Гевгелија се обидоа со два автомобила да пренесат осум мигранти. Од основното јавно обвинителство велат дека лицата се осомничени за кривичното дело криумчарење на мигранти.
Криумчарите биле фатени од полицијата вчера утро на паркингот кај местото викано Касарна во Гевгелија. Тие се обидувале да ги сместат мигрантите во возило мерцедес со бугарски регистарски таблички, кои пак биле пријавени за украдени во текот на минатиот месец во Гевгелија. Кога наишле полициските службеници, полицаецот се обидел да го лиши од слобода првоосомничениот, 26-годишен криумчар од Скопје, а тој физички го нападнал полицаецот при што е испукан куршум што завршил во мигрантката која седела на задното седиште во автомобилот.
Жената веднаш е префрлена во Општа болница Гевгелија каде е констатирана смрт.
Надлежен обвинител од Одделението за истражување и гонење на кривични дела сторени од лица со полициски овластувања и припадници на затворската полиција при Основното јавно обвинителство за гонење на организиран криминал и корупција, со цел да се испита одговорноста на полицискиот службеник формира предмет и донесе Наредба за вештачење на папиларните линии на службениот пиштол, како и на други траги врз основа на кои ќе се утврди кој го испукал куршумот со кој е предизвикана смртта кај мигрантката.
Симона Петровска