Мавровското Езеро порибено со 460 килограми крап во пресрет на Светското првенство во спортски риболов на крап, кое ќе се одржи во септември. Акцијата ја реализираше Јавната установа Национален парк „Маврово“ во соработка со Energy Delivery Solutions, со цел збогатување на рибниот фонд и унапредување на условите за спортски риболов пренесува МИА.
Од Националниот парк посочуваат дека порибувањето е дел од активностите за зачувување на природните ресурси и одржливо управување со езерото. Во текот на пролетта, Мавровското Езеро во две акции беше порибено со повеќе од четири тони крап.
Поради подготовките за светското првенство, крапот е под временска забрана за спортски риболов до завршувањето на натпреварот. Надлежните апелираат до риболовците и посетителите да ги почитуваат мерките, додека службите на Националниот парк спроведуваат засилени контроли на терен. Светското првенство е планирано да се одржи од 2 до 5 септември.
