Потврдени се доживотните затворски казни за убиството на 14-годишната Вања Ѓорчевска од Скопје и на 74-годишниот Панче Жежовски од Велес, додека ослободителната пресуда за таткото на девојчето е вратена на повторно судење.
Ваква одлука донесе апелациониот суд кој му наложил на Кривичниот суд одново да ја спроведе постапката, да ги преоцени доказите и да си ја преиспита пресудата за Александар Ѓорчевски.
Тој беше обвинет дека помогнал во грабнувањето на неговата ќерка која беше убиена од Љупчо Палевски-Палчо, Велибор Манев, Боре Видевски и Влатко Кешишев.
За нив доживотните казни се потврдени, и тоа за грабнувањата и свирепите убиства на двете жртви. Малолетната Вања и велешанецот Панче, кои беа пријавени за исчезнати на 27 и 24 ноември, беа пронајдени мртви во близина на Скопје и Велес на 3 декември 2023 година.
