САД и Иран втора ноќ по ред разменија оган, со што дополнително се заострува кризата на Блискиот Исток. Американската Централна команда соопшти дека извршила напади врз околу 90 воени цели во Иран, вклучувајќи системи за противвоздушна одбрана, складишта за ракети и дронови, како и воена инфраструктура долж иранскиот брег.
Иранските власти соопштија дека возвратиле со напади врз американски воени локации во Бахреин и Кувајт, додека повеќе земји од Персискиот Залив пријавија експлозии, пресретнати ракети и засилени безбедносни мерки. Претседателот на САД, Доналд Трамп, изјави дека нападите се одговор на претходните ирански акции врз трговски бродови во Ормускиот Теснец.
Меѓувреме, претседателот на иранскиот парламент и главен преговарач со САД, Мохамад Багер Галибаф, порача дека „насилството и прекршувањето на ветувањата повеќе нема да бидат без последици“. Новата ескалација повторно ги зголеми стравувањата за поширок регионален конфликт и предизвика раст на цените на нафтата на светските пазари.