Ако стравувавме дали смената на генерации ќе значи и изоставување на Македонија од големите натпреварувања, сега сомнежите се отстранети. Ракометарите обезбедија ново учество на СП , осмо во низа, а вкупно 10 кога во прашање е оваа наша селекција. Во баражот со Словачка прв пат не стравувавме дека нешто може да се изјалови, туку уживавме во ракометната претстава која избраниците на селекторот Кирил Лазаров ја прикажаа и сосема заслужено се најдоа меѓу 32 селекции кои ќе играат на првенството кое ќе се одржи во јануари догодина во Германија.
Познато е и дека Македонија од вториот шешир ќе ја чека ждрепката на 10 јуни со која ќе бидат одредени групите за првата фаза од споменатот натпреварување. Покрај нашиот тим во иста конкуренција се и Франција, Словенија, Норвешка, Србија, Шпанија, Италија и со Фарските Острови кои не можат да бидат наши противници.
Од нашиот табор најавуваат дека квалитетот кој го поседува овој национален тим може да изненади на претстојниот ракометен мундијал.
„Имаме многу квалитетни играчи кои играат долг период, големи светски натпреварувања, играат во Лигата на шампиони, во Европската лига, во Бундес лигата, во Француската лига, мислам дека сме доволно квалитетни да изненадиме. Со малку среќа, со поволна ждрепка и да сме сите здрави“ рече голманот Никола Митревски.
Од РФМ информираа дека за пласманот на СП на машката селекција ќе и биде доделена прична награда од 1 500 000 денари.
Наташа Станчиќ