Најмалку 20 луѓе се убиени денеска во руските напади ширум Украина, пред да стапат на сила едностраните примирја кои одделно ги предложија властите во Москва и Киев.
Украинскиот претседател, Володимир Зеленски, изјави дека пет цивили се убиени кога неколку руски ткн „лизгачки бомби“ биле фрлени врз центарот на градот Краматорск, додека властите во градот Запорожје соопштија дека 12 лица загинале во напад со руски проектил.
Жртви има и во Русија, каде властите во Републиката Чувашија соопштија дека утринава две лица биле убиени, а 32 повредени во напад со дрон.
Вчера, Русија и Украина прогласија еднострани примирја пред одбележувањата што Русија ги организира за победата на Советскиот Сојуз над нацистичка Германија, кои ќе се одржат во сабота.
Русија соопшти дека ќе има примирје на 8-ми и 9-ти мај и се закани со „масовен ракетен напад“ врз центарот на Киев ако Украина го прекрши примирјето.
Но Киев најави дека ќе почитува отвореното примирје од полноќ на 6-ти мај и дека Украина ќе постапува „симетрично“ од тој момент.
Двете примирја се еднострани – што значи дека страните не се договориле за условите, времетраењето или надзорот на прекинот на огнот.
Прославите на 9-ти мај, кои ја одбележуваат победата на Советскиот Сојуз над нацистичка Германија, се зголемија по обем и раскош од почетокот на владеењето на Владимир Путин во Русија, кон почетокот на 2000-тите.
Но Кремљ соопшти дека годинава главниот настан – голема воена парада на Црвениот плоштад – ќе биде намален поради „терористичка закана“ од Украина, и дека нема да биде прикажана тешка воена техника.
Жителите на Москва исто така беа предупредени дека мобилниот интернет може да биде прекинат или ограничен неколку дена пред 9 мај.
Зеленски рече дека фактот што Русија смета дека не може да „одржи парада во Москва без добра волја на Украина“ значи дека руските лидери треба да „преземат чекори за завршување на војната“.
Украина во последните недели ги засили длабоките дронски напади врз Русија, погодувајќи енергетски објекти и рафинерии и нарушувајќи ја руската нафтена трговија.
Нејзините дронови сега можат да летаат длабоко во Русија, често избегнувајќи воздушна одбрана, а во понеделник наутро еден удри во висококатница во центарот на Москва.
Н.И