Иако првиот ден од продолжениот празничен викенд се поклопи со стартот на целосната примена на новиот систем за контрола при влез во земјите од Европската унија, сепак, на граничниот премин Меџитлија–Ники кон соседна Грција нема значајни промени во фреквенцијата. Наместо очекувани колони, само умерено зголемен број на возила. Според податоците на Министерството за внатрешни работи, во изминатите 24 часа преку Меџитлија излегле околу 4000 лица, од кои 800 се македонски државјани.
– Новиот дигитализиран систем за влез и излез во Европската унија за граѓани од земји кои не се членки, а кој од денес целосно се применува, засега не предизвикува поголем метеж на граничниот премин Меџитлија. Поголеми задржувања нема ниту на грчка страна.
Граѓаните кои се враќаа во Македонија велат дека на преминот Ники има возила кои чекаат за влез во Грција, но без подолги колони и сериозни застои.
-Земаат отпечатоци, не удираат печати на пасошите. Се враќаме од Грција и кога ја минавме границата видовме дека има мала гужва“, вели граѓанин.
Од Министерството за внатрешни работи уверуваат дека сите капацитети се ставени во функција за да се избегнат застои од макеодонска страна .
-Од страна на МВР се преземени сите потребни мерки и активности, односно ставени се во функција сите расположливи материјално-технички и човечки ресурси, со цел обезбедување брз и непречен проток на патници на нашите гранични премини“, изјави портпаролот на МВР, Гоце Андоновски.
На трите гранични премини кон Грција, Богородица, Дојран и Меџитлија, за 24 часа државата ја напуштиле над 17 илјади странски и македонски државјани.
новинар: Емилија Мисирлиевски
снимател: Златко Јосифовски