ЕСМ има на располагање околу 3.000 тони мазут од државните резерви кои може да ги користи кога ќе смета дека има потреба од тоа. Овие количини им следуваат по кризната состојба која се прогласи во декември поради тогашните протести на грчките земјоделците. Но, за да добие нови количини од државните складови според информациите од енергетските кругови, Владата ќе треба да прогласи и кризна состојба и на пазарот со струја. Според, последните податоци од МАКОРА – агенцијата за нафтени резерви во складовите има 5.000 тони мазут.
Во меѓувреме, според информации на Телма, грчкиот добавувач од каде се испорачува енергенсот за електрани, веќе го известил ЕСМ дека работи со разлика во цената, односно договорот кој го имаат со државната ЕСМ е со цена која е пониска во однос на онаа по која го набавуваат во Грција.
Од тука се поставува прашањето дали на ЕСМ ќе му требаат дополнителни количини мазут од државните складишта за да го добива по пониска цена. Во зависност од трошоците кои сега ги прави ЕСМ ќе зависи и новата цена на струјата за домаќинствата која ќе треба да ја оформи и понуди во следниот период.
Инаку, од државните резерви, ЕСМ лани искористи 10.000 тони мазут, а сега со последната кризна состојба доби уште 5.000 тони, односно половина од количините кои биле на располагање во тој момент.
