Центарот за управување со кризи (ЦУК) информира дека обилните врнежи синоќа предизвикале излевања на дел од реките, поплави на станбени објекти, земјоделско земјиште, подруми, како и одрони и свлечишта на патиштата. Граѓаните се повикуваат да пријават проблеми на бројот 112, а сите надлежни служби се активни на терен.
Најголеми штети се регистрирани во Кичево, каде се евакурани над 100 луѓе во спортска сала со греење, информираше градоначалникот Александар Јовановски за Телма. Тој објасни дека меѓу евакуиринатите има и болни луѓе за кои покрај топол оброк се обезбедува и лекарска помош.
Досега не е побарана помош од државата, на градот му помага и Црвениот крст. Штети се регистрирани и во Тетово и во Гостивар, каде одроните го отежнале сообраќајот, како и во Ресен, Охрид каде се поплавени дворови, земјоделско земјиште и подруми. ХЕЦ „Маврово“ пријави намалено производство поради излевање на Вардар.
УХМР најавува дека за време на викендот се очекуваат повторни локални врнежи и постепено опаѓање на температурите.
K.K.