Двајца студенти се убиени, а девет лица се повредени во масовно пукање што се случи на Универзитетот Браун во Провиденс, американската сојузна држава Род Ајленд. Нападот се случил во саботата околу 16 часот по локално време, кога вооружен маж отворил оган во училница во зградата „Барус и Холи“, каде во тој момент се одржувале завршни испити.
По инцидентот, универзитетот беше ставен во целосен карантин, а полицијата започна обемна потрага по осомничениот, кој сè уште е во бегство. Според полицијата, станува збор за маж облечен целосно во црно, со покриено лице, кој побегнал пеш по нападот. Објавени се и снимки од безбедносни камери, но оружјето не е пронајдено.
Здравствените власти соопштија дека поголем дел од повредените се во критична, но стабилна состојба. Идентитетите на жртвите засега не се објавени. Претседателката на Универзитетот Браун, Кристина Паксон, изјави дека станува збор за „длабоко трагичен ден“ за универзитетската заедница, додека локалните и федералните власти продолжуваат со интензивната истрага.