Петнаесет сендвичарници, бурекџилници и продавници за храна, во Скопје, Битола, Велес, Штип, Прилеп, Струмица, Сруга, Охрид, кои се наоѓаат, во и околу, основните и средни училишта, односно таму каде учениците најчесто купуваат храна, добиле забрана за вршење на дејност од Агенцијата за храна и втеринарство.
Директорот на АХВ, Оливер Миланов, за Телма вели дека во акцијата која била спроведена на територијата на целата држава, инспекторите на АХВ изрекле и парични казни за 77 оператори со храна, во вкупна вредност од 36.470 евра во денарска противредност.
Петнаесет забрани за вршење на дејност изрече Агенцијата за храна и ветеринарство на оператори со храна во рамки на 445 инспекциски контроли кои ги спроведе во изминативе десеттина дена. Како небезбедни, АХВ заплени и нештетно уништи 696 килограми небезбедна и храна од непознати добавувачи, изјави Миланов.
Инспекторите на АХВ утврдиле и дека 19 оператори во промет ставиле небезбедна храна, додека кај 30 е утврдено дека немаат задоволителни хигиенските прописи за безбедност на храната.
Од вкупно контролираните, 26 не биле регистрирани како оператори со храна во Агенцијата за храна и ветеринарство. Шеснаесет оператори немале имплементирано процедури за Добра хигиенска и Добра производствена пракса, а дури 32 немале спроведено задолжителен здравствено-саниратен преглед на вработените лица, изјави Миланов.
Во акцијата на Агенцијата за храна и ветеринарство, во која учествувале педесетина инспектори, утврдено е и дека тројца оператори со храна немале спроведено задолжителна дезинфекција, дезинсекција и дератизација во објектите, а 7 од контролираните објекти не ги задоволувале техничките услови за вршење на дејноста. Контролите откриле и несоодветно означена храна кај седум оператори со храна.
Инспекторите на Агенцијата за храна и ветеринарство, освен забраната за работа за 15 места за продажба на храна во близина на училишта и паричните казни за 77 од 445 проверени места, издале и 103 решенија со наредби за отстранување на утврдени недоследности, а изречени се и 23 опомени.
Миланов вели дека акцијата е спроведена во рамки на редовните планирани контроли, но оти во следниот период Агенцијата ќе продолжи и со вонредни инспекциски контроли на целата територија на државата на сите оператори со храна кои што произведуваат, увезуваат, препакуваат секаков вид на храна.
Тамара Грнчароска