„Нова итроштина“ вака премиерот го толкува предлогот на лидерот на опозициската СДСМ, Венко Филипче, да се донесе декларација во Собранието со „црвени линии“ дека, доколку има ново вето, ќе се стави крај на преговорите со ЕУ.
Вели дека игра на картата на кратка меморија и го потсети дека веќе одбиле слични декларации, да не прифаќаат ултиматуми од Софија и да нема промена на името, а не ги почитувале ниту резултатите од референдумот.
„Нашата позиција како Влада ја знаете, не треба да ја повторувам, така што тој тип на итроштини ќе ги оставиме во минатото, коешто е поразено“ изјави премиерот Христијан Мицкоски.
И поранешниот министер за надворешни работи е против нови декларации. Вели дека, најдобриот пат за да нема ново вето е да се почитуваат договорите. Побара и да се постигне договор, темата ЕУ да не се користи во изборната кампања.
„Ајде да потпишеме договор сите политички партии дека за тема Европска унија нема да се критикуваме, нема да се напаѓаме, ќе ја преземеме заеднички одговорноста. И ајде да ги почитуваме договорите, бидејќи тие не штитат нас“ изјави Бујар Османи.
Неговиот против-кандидат за Чаир, пак, побара за парламентарни теми да не се разговара пред локални избори.
„Некој живее во филм од пред 2001, Бадентер и Балансер не се теми за на локални избори“ изјави Изет Меџити, министер за животна средина.
Апелите се резултат на преовладувањето на општествените теми над локалните, во пресрет на локалните избори.
Далиборка Демјанска