Недоразбирањата во фудбалскиот клуб Вардар на релација управа и навивачи ќе продолжи и во новата година. Тимот денеска ги почна зимските подготовки во својот тренинг-центар во Хиподром, но на навивачите и членовите на маркетинг тимот им беше забранет влез во истиот.
„Црвено-црните“ на чело со тренерот Гоце Седлоски стартуваа со тренинзи за вториот дел од сезоната, но атмосферата околу клубот очигледно нема да се подобри. Членовите на навивачката група Комити, кои се дел од маркетинг тимот на Вардар денеска добиле забрана за влез во тренинг-центарот од извршниот директор на клубот Миленко Неделковски.
Навивачите веднаш го блокираа влезот и излезот од тренинг-центарот и побараа од управата на клубот да го почитува договорот помеѓу здружението „35 години Вардарци“ и новиот сопственик Атила Бижен Жалили.
Комити преку здружението „35 години Вардарци“ задржаа 15 отсто од акциите на клубот откако тој премина во рацете на новиот газда. Изминатата полусезона постојано имаше недоразбирања помеѓу навивачите и извршниот директор на клубот Миленко Неделковски, а двете страни очигледно се далеку од примирје.
