Шпанија е на нозе и покрај тридневната жалост во земјата. Бројот на жртви во катастрофалните поплави во Валенсија е над 200, хаосот се расчистува со механизација. И додека спасувачките операции продолжуваат, а во потрагата по исчезнати се вклучени и дронови, државната метеоролошка служба со предупредување за нови дождови, но и црвен и портокалов аларм за Валенсија и Кастењон, најтешко погодените подрачја.
Граѓаните во страв по апелите на владата дека вонредната ситуација сè уште не е завршена. Она што го доживеаја во вторникот го опишуваат како катастрофа, а пустошот што водата го остави зад себе го споредуваат со цунами. Голем дел од нив минуваат долг пат низ калливите улици за да дојдат со храна и чиста вода за пиење.
Невремето парализира бројни сообраќајници. Се проценува дека 150.000 луѓе во Валенсија останаа без електрична енергија по првичниот удар на невремето. ВБо прекин е и железничкиот сообраќај, вклучувајчќи ја и брзата пруга за Мадрид. Официјални претставници порачаа дека ќе бидат потребни две до три недели за санација на штетите.
Опозицијата ја обвини владата во Мадрид за пребавна реакција, но и за ненавремено предупредување на населението и за ненавремено праќање на спасувачки тимови. Министерството за внатрешни работи, пак, ги обвини локалните власти за лоша реакција и оти не се преземени соодветни мерки за цивилна заштита. Шпанската полиција уапси 39 лица кои пљачкаа во поплавените подрачја кај кои се пронајдени голем број на украдени предмети.
Воздушниот систем ДАНА кој ги предизвика поплавите, почна да слабее, но метеоролозите најавуваат нови врнежи за денеска и утре. Најсилните се очекуваат вечерва на истокот и југот на Шпанија, на северот на Валенсија, особено во околината на Тарагона, Кастиња, како и Менорка и Мајорка. Но, и во југозападниот дел на Андалузија, околу Хуелва и Кондада.
Сашко Димовски