Опозицијата иницираше, а Собранието не прифати политичка одговорност за спикерот Гаши. Дваесет и еден беа „ЗА“, а 72 пратеници го притиснаа црвеното копче, по целодневната расправа во Собранието.
Најпрво партиите од албанскиот блок се солидаризираа и препознаа етничка позадина, албанофобија и исламофобија во иницијативата за интерпелација, поднесена од Левица. Потоа, владејачкото мнозинство во Собранието покажа единство, откако и ЗНАМ се изјаснија дека ќе гласаат против, покрај ВМРО-ДПМНЕ и коалицијата Вреди.
Спикерот Гаши кратко се обрати пред пратениците, а потоа ја напушти салата и кажа дека од страна ќе следи што се случува на седницата.
Во јавноста имаше дилеми дали пратениците од Движењето ЗНАМ ќе ја поддржат интерпелацијата за спикерот, со оглед на тоа што во повеќе наврати имаа несогласувања внатре во владината коалиција. Дилемите за тоа како ќе гласаат ги расчисти пратеникот Павле Арсовски кој посочи дека тие даваат поддршка на Гаши и покрај тоа што имаат забелешки за неговата работа. Обидот за интерпелација сметаат дека е за собирање на политички поени од страна на опозицијата.
Од СДСМ истакнаа дека ќе гласаат за интерпелација на Африм Гаши поради тоа што повеќето скандали досега за нив се доволни за да се повика на одговорност спикерот.
Од опозициската ДУИ препознале етнички предзнак на обидот за интерпелација на Гаши иако и тие имаат забелешки за неговата работа.
На говорницата се дискутираше за заклетвата на албански јазик, молитвата за жртвите од Сребреница, инцидентот кој обезбедувањето на Гаши го предизвика на скопскиот аеродром и како последно – преминувањето на границата на Гаши и сватовите, одејќи на свадба во соседно Косово.
Петар Догов