Очекуваме ветувањето на Владата за зголемување на минималната плата во првите 100 дена да се исполни, да се укине зголемувањето од 78 отсто на функционерските плати и да се ревидира пресудата за одземање на зградата, соопштија денес од ССМ.
Минималната синдикална кошничка од почетокот на годинава е потешка за 4.600 денари, минималните плати во регионот растат и Македонија се соочува со повторен егзодус на работниците доколку минималната плата не се покачи, велат од ССМ. Очекуваат средба со премиерот Мицкоски по ова прашање.
Според податоците на ССМ државите од регионот веќе ги покачија минималните плати кои сега изнесуваат од 500 до 800 евра, а проекциите се дека растот на просечната плата во март следната година ќе биде 15 отсто.
Потсетија дека барањето за укинување на 78 отсто повисоки плати сè уште седи во нечија фиока.
Од ССМ соопштија дека во идниот период ќе се бара итно потпишување на Општ колективен договор во приватниот сектор, потпишување на анексите за нови Колективни договори согласно Општиот во јавниот сектор, раст на минималната плата и поддршка на синдикатите во нивните барања за зголемување на платите.
ССМ денес одбележа 78 години постоење, а одлуката за формирање е донесена во паркот зад сегашниот дом на ССМ зградата која по судски пат беше одземена и Синдикатот се бори да ја задржи.
На почетокот на идниот месец во Македонија ќе дојде Естер Линч генерален секретар на Европската конфедерација на Синдикати а од ССМ бараат средба со претставници на Владата за актуелните проблеми на работниците во државата но и пресудата за одземање на седиштето.
Огнен Чанчаревиќ