Пет активни пожари и три под контрола е моменталната состојба на теренот, каде стотина пожарникари, припадници на АРМ, полицајци, странска помош и доброволци се борат со пламените јазици во повеќе региони од државата. Гори кај „Јасен“, на планината Галичица, Струга, Кичево, Демир Хисар. Сепак од Центарот за управување со кризи (ЦУК) потенцираат дека состојбата на терен се менува од час во час.
Пожарот кај „Јасен“ е во фокусот на ЦУК и таму се распоредени голем број на пожарникари, специјалните полициски сили, унгарските пожарникари и „Ер трактори“.
Ангелов е оптимист дека пожарот на Галичица, кој гори веќе четврти ден, ќе биде запрен и локализиран.
ЦУК доби и ненајавена помош од пилоти на комерцијални летови кои при прелет преку Македонија до контролата за летање пријавиле два нови пожара.
Четириесет и шестчлениот пожарникарски тим од Унгарија денеска си заминува од Македонија, а од утре на терен ќе дејствува хеликоптер од Словенија.
Полицијата досега откри 10 лица против кои се поднесени кривични пријави за предизвикување на општа опасност или предизвикување на шумски пожар. Последни во низата се 57-годишен прилепчанец, кој е осомничен за пет подметнати пожари на територијата на Македонски Брод, и три лица од Скопје кои биле фатени во близина на селото Патишка река, исто така, откако подметнале пожар.
МВР ги подигна дроновите за да може полесно да ги улови подметнувачите на шумските пожари. Дроновите ќе летаат 24 часа во денот во повеќе подрачја од државата и се опремени со термални камери за да бидат оперативни и во ноќни услови.
Огнен Чанчаревиќ