Закон за урбанистичко планирање да се разгледува од комисијата за европски прашања за опозицијата е една од најскандалозните работи што досега се случиле во собранието.
Тврдат дека, надлежно матично работно тело за овој закон во секој Парламент во Европа е комисијата за урбанизам, транспорт и врски.
Милошоски тврди дека и од германската делегација со која вчера се сретнаа им кажале дека, темите како работни односи, урбанизам и експропријација ниту во Германија не се разгледуваат со европско знаменце.
Во одбрана, пратениците од владејачкото мнозинство го повторуваа ставот на американската амбасадорка, дека „Бехтел и Енка„ се сериозна компанија, велејќи дека и ова е сериозен проект.
Опозицијата и денеска упорно бара увид во договорот за градба, велејќи дека нив не ги интересираат деловните тајни на изведувачот, односно каков асфалт ќе стават, од каков тип е бетонот што ќе биде вграден, потеклото на арматурата и слично.
Бараат цена, по ставки и сумарна, динамика и рок на изградба, како и дали има двострани пенали, колку македонски фирми и работници се ангажирани и кои се условите за раскинување на договорот.
Далиборка Демјанска Цветановска